أنحنا عبابسه - قصيدة بالعامية للشاعر مجدي محمد الأمين

أنحنا رباية السَّمحينْ..

ومعروفين أسود الدِّينْ..

أنحنا (عبابسه) مفتخرينْ..

وما بيجهلنا غير مسكينْ..

***

ونحنا السَّاده والقادهْ..

ولينا الصَّعبه منقادهْ..

ونحنا الخلوه أسيادها..

ونحنا اللي الكتاب وارثينْ..

***

أنحنا الجدنا (العبَّاسْ)..

وفينا العافيه والفرَّاسْ..

ونحنا كرمنا ما بنقاسْ..

ولي شرع الإله حافظينْ..

***

ونحنا أبونا (شرْف الدِّينْ)..

زعيم الخيره والخيرينْ..

وبي تاريخه متباشرينْ..

أكان في الدُّنيا ولا الدِّينْ..

***

ونحنا دمانا تنبض عزْ..

وللمحتاج يمين بنفزْ..

ونثبت في المحاصه أم جزْ..

يوم الشَّكره للثَّابتينْ..

***

أنحنا (عبابسه) لينا أصولْ..

وعزَّنا فينا مو بالقولْ..

وكان خاويتنا ده المأمولْ..

وكان عاديتنا حظَّك شينْ..

***

أنحنا الرَّحمه لينا شعارْ..

من خرطومنا لي (سنَّارْ)..

وفي (دار التَّكاكي) منارْ..

ولي كلَّ القلوب مالكينْ..

***

ونحنا أراتله في (البُوشابْ)..

ونحنا اللِّينا أوسع بابْ..

ونحنا الفي القبايل نابْ..

وما بنستقوى بي ظالمينْ..

***

ونحنا الخلوه في (ود كيرْ)..

ونحنا حمارنا في (السَّنقيرْ)..

ونحنا الطِّيبه لينا سفيرْ..

ونحنا الفي العلوم فالحينْ..

***

ونحنا (الرَّاو) ونحنا (وهيبْ)..

ونحنا (أبايو) في التَّرتيبْ..

ونحنا شموس وما بتغيبْ..

ونحنا اللِّي العروض ساترينْ..

***

أنحنا السَّاس ونحنا الراسْ..

ونحنا الغرَّه في الفرَّاسْ..

ونحنا جدودنا أشرف ناسْ..

ونحنا الفي الكتال بينينْ..

***

ونحنا بناتنا مستوراتْ..

لا هن عاله لا قاهراتْ..

وفيهن عفه ما بتنفاتْ..

ونحنا الفي الغرام دايبينْ..

***

أنحنا (عبابسه) سمحين زيْ..

وما فينا البعرف الغيْ..

ونحنا اللي الهجاير فيْ..

ونحنا الدِّيما متضامنينْ..

***

أنحنا (عبابسه) سمحين رايْ..

وفينا الشَّاعر الغنايْ..

وفينا الرَّاوي والحكَّايْ..

وفينا الطِّيبه والطَّيبينْ..

***

أنحنا (عبابسه) متكاتفينْ..

ومعروفين أسود الدِّينْ..

ونحنا البيه منتصرينْ..

وما بيجهلنا غير مسكينْ..

***